Öввö

Пöчö менö видзлывлiс,
Потан дорын сьывлывлiс:
      «Öввö, öввö, öввö».
Пöчö менö ланьтöдö, 
Кыдз пу лайкан дзуркöдö:
      «Луйк-лайк. Луйки-лайк».
Пöчö сьылö нораа,
Лайкан дзуртö гораа:
      «Дзурк-дзурк. Дзурки-дзурк».
Зарни пиöй, узь нин, узь!
Сьöлöмшöрöй, узь нин, узь!
      «Öввö, öввö, öввö».
Шебрас кокöн чужъялас,
Ичöт кекöн шыблалас.
      «Öввö, öввö, öввö».
Пöчö бара тубыртас,
Эшкын улö шебрöдас.
      «Öввö, öввö, öввö».
Кодыр дугдас сьывны пöч, 
Кута лöвтны ачым тшöтш:
      «Öв, öв-öв, öв».
Пöчö бара нин сьылö:
«Вöрын лэбалö сильö.
      Öввö, öввö, öввö.
Айыд мунiс вöравны,
Сьöла-урöс лыйлыны.
      Öввö, öввö, öввö.
Зэв öд сiйö ачус зiль, 
Ваяс тэныд уна силь.
      Öввö, öввö, öввö.
Мамыд мунiс турунла.
Регыд локтас... Эн бöрд, эн!
      Öввö, öввö, öввö.
Быдман — ыджыд лоан морт,
Вылö лэбзян пöтка-борд!..
      Öввö, öввö, öввö… »

Кузя тадзи сьылас пöч,
Кытчöдз оз ланьт ачыс тшöтш.
      «Öввö, öввö, öввö».
Ывла-н вой тöв шутьлялö,
Керка-н шоныд онялö.
      «Öввö, öввö, öввö».
Кага потан довъялö,
Пöчö сэнi вугралö.
      «Öввö, öввö, öввö…»
Тайö гижа тiянлы,
Сьöлöмшöр ныв-пиянлы
Уна олöм во бöрын
Муса Коми му вылын.
Гашкö, коркö сьылыштлад,
Посни чой-вок ланьтöдлад:
      «Öввö, öввö, öввö».
Тайö сьыланкывъясас,
Небыд, мича шыясас
Кылö вöрлöн шувгöмыс,
Коми йöзлöн олöмыс, 
Важся тiльсьöм-мырсьöмныс,
Выльын гажсö перйöмныс.

1920, Вениамин Тимофеевич Чисталёв