Өглөө жингээр униартаж л байдаг
Өдөр дундаа суунаглаж л байдаг
Үеийн үедээ өнөтэй тарган байдаг
Өргөн өндөр, хүдэр баяхан буурал
Алтай хангай хоёр минь ээ

Арын Ховдын нуруу нь дүнхийж л байдаг
Рашаан ус нь булгилж л байдаг
Ангир шувуу нь ганганаж л байдаг
Арц мод нь сагсайж л байдаг
Арвин уужим сайхан баяхан буурал
Алтай хангай хоёр минь ээ

Шилээ цасыг хайлан
Шилгээтэл урсаж л байдаг
Шинэхэн ногоо нь ургаж л байдаг
Хөхөө шувуу донгодож л байдаг
Үнэхээрийн сонин сайхан баяхан буурал
Алтай хангай хоёр минь ээ

Суухай уулын нуруу нь дүнхийж л байдаг
Шоровгор ямаа нь шаргалдаж л байдаг
Дарзай нуруу нь дүнхийж л байдаг
Халиун тэх нь харгилдаж л байдаг
Үнэхээрийн сонин сайхан баяхан буурал
Алтай хангай хоёр минь ээ