Соңга калдың инде дисең миңа,
Нигә әле соңга калыйм мин.
Соң булса да тапкан бәхетем син,
Күзләреңнән күзне алмыйм мин.

Соңга калдым диеп үкенмимен,
Йөрмим әле бер дә аптырап.
Иртә табып аны югалтудан,
Соң табуың күпкә яхшырак.

Нигә дип без элек күрешмәдек
Юллар кисешкәнен күрмәдек.
Вакыт узган икән гел заяга
Бәхетләрне читтән эзләдек.

Бәхет ачкычлары кулыбызда,
Соң булса да, әйдә уң булсын.
Миннән башка узган гомереңне
Җитәкләшеп кабат узарсың.