Музыка и стихи Альберта Узденова.

Боз булутла къачхы джелге бойсуна,
Барадыла къыбла таба шималдан,
Чырмалалла Минги Тауну бойнуна,
Кёб мычымай, къарайдыла башындан.

Булутлагъа тирелмезге кюреше,
Садакъ учхан халда уста тизилиб,
Бир-биринден хапар биле, сёлеше,
Къалмасын дей, онгсузуракъ юзюлюб.

Учадыла къыбла таба турнала,
"Сау къал" дей, булгъай къанат таулагъа.
Бир кёзюуде кюн сокъгъанча зурнала,
Джюреклеге ёксюзлюкню чакъыра.

Ким биледи, энди сизни ненчагъыз
Къайтмай къалыр джаз бла бирге таулагъа?
Сиз къайтыргъа, таулада да ненчабыз
Кете бара, сукъланырла саулагъа?