музыка Мустафира Жеттеева
стихи Иссы Боташева

Ой анам хариб, сен мени аллыма
Кёз къакъмай къарагъанлы азмы болду?
Джюрегинг ийнанмайд тас болгъаныма.
Огъурлу бетинг былай сазмы болду?

Анам хариб, джолгъа бош къараб турма.
Кир юйге, кёремисе кеч болгъанды?
Джюрегингде ашхы умутла къурма,
Джашынг солдат эд, солдатлай къалгъанды.

Анам, энди урушдан къайтыб келиб,
Сени тансыкълай, тору атымдан тюшмем.
"Анам, урушда бек суусаб болдум", - деб,
Халал къолунгдан айран алыб ичмем.

Ол сени аналарына санаучу
Кёб тенгим урушдан къайтхан болмазла.
Зыбыр къолунг бла сылаучу
Башыма окъ тийгенин ала айтхан болмазла.

Эрни иши алайды, алайды, джаным,
Аны къабыры элинде болмайды.
Ата джуртуна къоркъуу тюшсе, анам,
Ол къанын джанында артха салмайды.

Кир юйге, анам, кеч болгъанд, кёресе.
Энди манга сен къурманлыкъла атама.
Энди манга отоу джасаб не этесе?
Белгисиз солдат къабырда джатама.