J'aim sans penser laidure
Et ay lonc temps ame
Celle ou dieus et Nature
Ont mis tant de bonte.
Que toute creature
D'onneur a seurmonte.

Or m'est dure
Sans mesure.
N'elle n'a pite
De l'ardure
Que j'endure
Pour sa grant biaute.

Sa maniere seure.
Douce et simple, a mon gre.
Et la riche faiture
De sa plaisant biaute
Par leur douce pointure
M'ont conquis et outre.

Or m'est dure...

Mais ce n'est pas droiture
Qu'einsi pour loyaute
Soie a desconfiture.
Car j'ay sans faussete
Ma dame nette et pure
Servi et honnoure.

Or m'est dure...