Мәтрүшкәләр
Мәтрүшкәләр, кипкән мәтрүшкәләр,
Йыраҡтарҙан әсәй ебәргән.
Мәтрүшкәләр кипкән, мәтрүшкәләр,
Тыуған ҡырҙарымда тирбәлгән. 

Тәрән һағыныуҙарҙан уйсанланған
Күҙ ҡарашым һеҙгә төбәлгән.
Әйтегеҙсе миңә мәтрүшкәләр,
Ни әйтергә әсәй теләгән?

Мәтрүшкәләр, мине уяттылар,
Һиҫкәндереп ғәмһеҙ төндәрҙә.
Мәтрүшкәләр кеүек киберһегеҙ
Өҙөлһәгеҙ тыуған ерҙәрҙән!