Музыка Касбота Тамбиева, стихи Биляла Лайпанова.

Джулдуз джанад, кёз къамата кечеде,
Танг атханлай, тас боллугъун билсе да.
Чыкъ да тюшед мынчакъ кибик ингирде,
Кюн чыкъгъанлай, думп боллугъун сезсе да.

Припев:
Инанма сен, джолунг джарды деселе.
Инанма сен, дуния тарды деселе.
Инанма сен, джюрек тотду деселе.
Инанма сен, насыб джокъду деселе.

Чыпчыкъ бала уясындан къарайды,
Термиледи дженгил ёсюб, учаргъа.
Боз булут да кюн аманны марайды,
Джангур болуб, джерни юсюн джууаргъа.

Припев.

Джан излейди оюнланы ашхысын,
Тууар кюнню бачхыч этиб кесине.
Бир джагъадан бир джагъагъа ашыгъыб,
Атлайды ол, умут тюшсе эсине.

Припев.

Таулу атын тас этмезин унутма.
Аты джокъну тауусулур къарыуу.
Джюрегинге джанган отну суутма,
Батхан кюнню кёбге бармаз джылыуу.

Припев.