Песнь 1, 
Ирмос: Помо́щник и Покрови́тель бы́сть мне́ во спасе́ние; се́й мо́й Бо́г, и просла́влю Его́, Бо́г отца́ моего́, и вознесу́ Его́, сла́вно бо просла́вися. Исх.15:1-2.
Песнь 2
Ирмос: Вонми́, не́бо, и возглаго́лю, и воспою́ Христа́, от Де́вы пло́тию прише́дшаго.
Ирмос: Ви́дите, ви́дите, я́ко аз е́смь Бо́г, ма́нну одожди́вый и во́ду из ка́мене источи́вый дре́вле в пусты́ни лю́дем Мои́м десни́цею еди́ною и кре́постию Мое́ю. Исх.16:14, 17:6.
Песнь 3
Ирмос: Утверди́, Го́споди, на ка́мени за́поведей Твои́х, подви́гшееся се́рдце мое́, я́ко Еди́н Свя́т еси́ и Госпо́дь.
Песнь 4
Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й и убоя́хся; сла́ва си́ле Твое́й, Го́споди.
Песнь 5
Ирмос: От но́щи у́тренююща, Человеколю́бче, просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́. Пс.62:2, 118:45.
Песнь 6
Ирмос: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.
Песнь 7
Ирмос: Согреши́хом, беззако́нновахом, непра́вдовахом пред Тобо́ю, ниже́ соблюдо́хом, ниже́ сотвори́хом, я́коже запове́дал еси́ на́м; но не преда́ждь нас до конца́, отце́в Бо́же. Дан.9:5-6.
Песнь 8
Ирмос: Его́же во́инства небе́сная сла́вят, и трепе́щут Херуви́ми и Серафи́ми, вся́ко дыха́ние и тва́рь, по́йте, благослови́те и превозноси́те во вся́ ве́ки.
Песнь 9 
Ирмос: Безсе́меннаго зача́тия рождество́ несказанное, Ма́тере безму́жныя нетле́нен Пло́д; Бо́жие бо рожде́ние обновля́ет естества́; те́мже Тя́ вси́ ро́ди, я́ко Богоневе́стную Ма́терь правосла́вно велича́ем.