Вскýю шатáшася язы́цы, и лю́дiе по­учи́шася тщéтнымъ? Предстáша цáрiе зéмстiи, и кня́зи собрáшася вкýпѣ на Гóспода и на Христá егó. Растóргнемъ (растóргнимъ) ýзы и́хъ и от­вéржемъ (от­вéржимъ) от­ нáсъ и́го и́хъ. Живы́й на небесѣ́хъ посмѣéт­ся и́мъ, и Госпóдь поругáет­ся и́мъ. Тогдá воз­глагóлетъ къ ни́мъ гнѣ́вомъ сво­и́мъ и я́ростiю сво­éю смятéтъ я́: áзъ же постáвленъ éсмь Цáрь от­ негó надъ Сióномъ, горóю святóю егó, воз­вѣщáяй повелѣнiе Госпóдне. Госпóдь речé ко мнѣ: Сы́нъ мóй еси́ ты́, áзъ днéсь роди́хъ тя́: проси́ от­ менé, и дáмъ ти́ язы́ки достоя́нiе твоé, и одержáнiе твоé концы́ земли́: упасéши я́ жезлóмъ желѣзнымъ, я́ко сосýды скудéльничи сокруши́ши я́. И ны́нѣ, цáрiе, разумѣйте, накажи́теся вси́ судя́щiи земли́. Рабóтайте Гóсподеви со стрáхомъ, и рáдуйтеся емý со трéпетомъ. Прiими́те наказáнiе, да не когдá прогнѣвает­ся Госпóдь, и поги́бнете от­ пути́ прáведнаго, егдá воз­гори́т­ся вскóрѣ я́рость егó: блажéни вси́ надѣющiися нáнь.