Ой, знаці, знаці па весельлейку (вясельная сіраце)

Ой, знаці, знаці па весельлейку,
Што Волячка сіраціна.

Што Волячка сіраціна.
Двор яе велікі, збор невелікі,
Ні ўся ж яе радзіна.

Ні ўся ж яе радзіна.
Німа ж радзіны ні палавіны,
Ні роднаго бацюхна.

Ні роднаго бацюхна.
Ой, каго паслаць, ой, каго паслаць
На той сьвет па бацюхна?

На той сьвет па бацюхна.
Паслаць пасылы – сівы галубы
Туды не далятаюць.

Туды не далятаюць.
Ее ж бацюхно, ее родненькі
Етае ён сам знае.

Етае ён сам знае.
– Не магу ўстаці к свайму дзіцяці,
Да й парадачак даці.

Да й парадачак даці.
Цісовы доскі сьціснулі ножкі,
Ні магу я устаць.

Зап. І.В. Мазюк у 2005 г. у в. Баранава Старадарожскага раёна ад Марыі Усік, 1931 г.н.