Ак мамыктай энҗе йомшак карлар ява,
Бар җиһанны күмеп аклык-сафлыкларга.
Зур өметләр белән көтә һәрбер кеше
Яңа елны, яңа таңны каршыларга.

Әйдә,дуслар, шушы зәңгәр айлы кичтә
Чын күңелдән телик изге теләкләр.
Ак бураннар өеп, алып килсен безгә
Яңа елда яңа бәхет-шатлыклар.

Әкияттәй бүген серле бөтен дөнья,
Җемелдәшә ап-ак карның бөртекләре.
Чыршыларда уйный сихри  якты утлар,
Җилкендереп безнең һаман күңелләрне.