Ария Наргизы
Музыка Эльмира Низамова
Слова Рената Хариса

Туган илем! Шәһре Болгар!
Изге сулы  Иделем!
Ярларыңны үбә торган
бер дулкының идем мин...

           Әй, Иделем-Иделкәем,
           килә синдә каласым,
           бер агарып, бер күгәреп,
           нигә дулкынланасың?
           Әй, болыннарым, үрләрем,
           килә сездә каласым,
           мәхәббәт ялкыннарында
           дөрли-дөрли янасым...

Бөек Биләр! Горур Сувар!
Урманнарым-кырларым!
Сүндермәгез  кайтавазын
мин җырлаган җырларның.

           Әй, урманнарым-кырларым,
           килә сездә каласым.
           Нигә чишмәләр  моңая?
           Нигә таллар ямансу?
           Әй, болыннарым, үрләрем,
           килә сездә каласым,
           мәхәббәт ялкыннарында
           дөрли-дөрли янасым...