Өс мөйөшлө хаттар
Һинән ҡалған иҫтәлеккә
Тереләргә тик бер фото,
Аманаттың иң һуңғыһы -
Өс мөйөшлө һалдат хаты.

Хаттар, хаттар һарғайғандар,
Аямаған һеҙҙе йылдар,
Тик шулай ҙа юйылмаған
Иң ҡәҙерле изге юлдар.

Һаумы, әсәй, туғандарым,
Ауылдаштар нисек йәшәй?
Ҡай арала ҡустым үҫте?
Яҙғанһығыҙ: тырышып эшләй.

Мин ер һөргән баҫыуҙарҙа
Игендәр ҙә бешкән икән,
Моңдаш дуҫым - һандуғастың
Иҫтәренә төшмәм микән?