Pos de chantar m'es pres talenz,
 Farai un vers, don sui dolenz:
 Mais non serai obedienz
 En Peitau ni en Lemozi.
Qu'era m'en irai en eisil:
 En gran paor, en gran peril,
 En guerra, laisserai mon fil,
 Faran li mal siei vezi.
Lo departirs m'es aitan greus
 Del seignorage de Peitieus
 En garda lais Folcon d'Angieus
 Tota la terra e son cozi.
Si Folcos d'Angieus no-l socor,
 E-l reis de cui ieu tenc m'onor,
 Guerrejar l'an tut li plusor,
 Felon Gascon et Angevi.
Si ben non es savis ni pros,
 Cant ieu serai partitz de vos,
 Vias l'auran tornat en jos,
 Car lo veiran jov'e mesqui.
Merce clam a mon conpaignon,
 S'anc li fi tort, qu'il m'o perdon,
 Et il prec en Jezu del tron
 En romans et en son lati.
De proez'e de joven fui,
 Mais ara partem ambedui,
 Et ieu irai m'en a Cellui
 On tut peccador troban fi.
Mout ai estat cuendes e gais,
 Mas Nostre Seigner no-l vol mais;
 Ar non puesc plus soffrir lo fais
 Tant soi aprochatz de la fi.
Tot ai guerpit cant amar sueill:
 Cavalaria et orgueill
 pos Dieu platz, tot o acueill,
 El que-m reteigna ab Si.
Totz mos amics prec a la mort,
 Qu-il vengan tuit e m'onren fort,
 Qu'eu ai agut joi e deport
 Loing e pres et e mon aizi.
Aissi guerpisc joi e deport,
 vair e gris e sembeli.