Беҙҙе оҙатҡанда күҙегеҙҙә,
Һағыш та, һөйөү ҙә сағыла.
Сал кергән сәстәрегеҙгә
Елдәр иркәләп ҡағыла.

Атай-әсәй, ҡәҙерлеләрем,
Йөрәгемдең һеҙ яртыһы.
Һеҙҙе һағынамын бигерәк,
Килә гел өйгә ҡайтаһы.

Тыуған өйҙөң йылы түрендә,
Өҫтәлдә гел ҡайнар сәйегеҙ.
Әсәйҙең йылы икмәге,
Беҙҙең турала һүҙегеҙ.

Өмөттәребеҙҙе һүндермәй,
Йәшәгеҙ оҙаҡ, атай-әсәй.
Йылы ҡосағығыҙ һаҡлай,
Беҙгә ел-ямғыр тейҙермәй.