Әле яңы ғына нурҙар һибеп 
Атҡан ине йәшлек таңдарым.
Ни арала ҡояш байышына
Кереп бара ғүмер юлдарым.

Үткән йылдар ҡайтмаҫтар барыбер,
Алдағыһы булһын ал да гөл.
Йөрәгем йәш, хыялым ҡанатлы,
Һис үҙгәрмәй икән был күңел.

Гел таң ғына булмай, ҡояш байый,
Алтын нурын һибеп, ҡыҙарып.
Алтын миҙгелдәрем әле минең,
Тик таңдарҙы ҡуям һағынып.

Йәш саҡтарҙа үтә барыһы ла,
Ә һуңынан терәк ныҡ кәрәк.
Йәшлек таңым йыраҡта ҡалһа ла,
Йәш шул әле һаман, йәш йөрәк.