Як пастарэю, буду добра знацца на старым
Вiне i кнiжным пыле.
Як пастарэю, буду чхаць на ўсiх старых, акрым
Сяброў, што нас любiлi.
Набуду пэндзлi, i пергамiн, i туш – 
I сяду ля ракi ў чаканнi целаў, душ,
Твой старасвецкi муж...
Свецкi муж.

Як пастарэю, грошы ўсе патрачу на прыймач,
А рэшту – на кватэру.
Як пастарэю, у кавярнi сяду, як глядач,
Зiрну i не паверу!
Набуду пэндзлi, i пергамiн, i туш – 
I праз акно глядзецьму, у чый гонар туш,
Твой старамодны муж...
Модны муж.

Як пастарэю, гальштук пабяру ды палiто
Ў старэнькiм сэканд-хэндзе.
Як пастарэю, то пачну не пiць, як абы-хто,
А выпiваць, як дэндзi.
Набуду пэндзлi, i пергамiн, i туш...
I ўсё скажу табе без словаў – а каму ж! –
Твой барадаты муж...
Даты муж.