Алан Царикаев

Хохы бæстыл мит æртайы,
Уалдзæг 'рхаста цин.
Мæ зæрдæ дæумæ æхсайы,
О, мæ буц æхсин!

Хуры рухсæй зæрдæ райы, —
Райдзаст хъæлдзæг бон.
Мæ цæстытыл, чызгай, уайыс.
Кæм дæ агурон?

Ауыдтон дæ дардмæ, чызгай, —
Бавзæрд та мæ уынд.
Сомы кæнын Терчы донæй —
Уымæн фын нæ уыд.

Рагæй Иры кадджын уыди
Даргъ дзыкку чызгæн.
Нарæг астæу, сау æрфгуыты 
Уацары фæдæн.

Дæ цæстытæ арвы дуарау 
Байгом сты мæнæн.
Федтон сæ, мæ амонд, — хурау
Бахудтæ фæлмæн.

Сау æрфыг, дæ мидбыл худты
Царды цин уыдтон.
Ма мын бауадз ме 'взонг хъуыды —
Басудзын бынтон.

Баууæнд мыл: мæ уды хъармæй
Батавдзынæн дæу.
Дзаг уыдзæн нæ хæдзар фарнæй,
Ды куы бауай мæн.

Ехх, фæзын мæм Бонвæрнонау,
О, мæ хуры хай.
Амондæй рæвдыд уæд вæййын,
О, рæсугъд чызгай.