ЗӔРДӔЙЫ ДИДИНӔГ
Дзерассӕ... О мӕ чызг Дзерассӕ,
Мӕ тугдадзин дӕ, ды мӕ бӕлон дӕ.
Ысты дын ме ’нгуылдзтӕ сӕрвасӕн,
Ды дӕттыс мӕ удӕн цӕрӕнбонтӕ,

Мӕ тых ӕмӕ мӕ ныфсдæттӕг — Дзерассӕ.
Мӕ зын ӕмӕ мӕ рыстсӕттӕг — Дзерассӕ.
Мӕ хорз фӕндтӕн сӕ фидиуӕг,
Мӕ зӕрдӕйӕн йӕ дидинӕг.

Дзерассӕ... О мӕ чызг Дзерассӕ,
Фӕнды мӕ, фарнимӕ куыд рӕзай.
Куыд тавай дунейы дӕ кастӕй,
Нӕ зӕххӕн амӕндтӕ куыд хӕссай.

Дзерассӕ... О мӕ чызг Дзерассӕ,
Цӕуыс мӕ конд фӕндагыл абон.
Мӕн халдих бакодтай ӕнгасӕй,
Ӕмӕ йӕ ахӕссын дӕр базон.

Дзерассӕ... О мӕ чызг Дзерассӕ,
Фӕнды мӕ, зарджытӕ куыд уарай.
Дӕ рухс ӕмӕ æхсидгӕ уарзтӕй
Цырӕгътӕ адӕмӕн куыд дарай.