Гуры жандармтæ куы рацæуынц —
Зилынц кæмтты цъалаты.
Гъей, гъей, гъей, мæ дуне,
Уæд зилынц кæмтты цъалаты.

Лаврент сæм рагъæй афтæ дзуры:
«Ме ’рдæм-ма рацæут фалæты».
Гъей, гъей, гъей, мæ дуне,
«Ме ’рдæм-ма рацæут фалæты».

Тыбылы-фырт æм афтæ дзуры:
«Æз абон мæ туг райсдзынæн».
Гъей, гъей, гъей, мæ дуне,
«Æз абон мæ туг райсдзынæн».

Дзераны-фырт æм афтæ дзуры:
«Ды мурдæр ницы райсдзынæ».
Гъей, гъей, гъей, мæ дуне,
«Ды мурдæр ницы райсдзынæ».

Тыбылы-фырт æй уæд куы фехста,
Йæ иу фæрсты ацыди.
Гъей, гъей, гъей, мæ дуне,
Йæ иу фæрсты ацыди.

Дзераны-фырт æй рагъæй рыхста,
Йæ рахиз цонг ныппырх и.
Гъей, гъей, гъей, мæ дуне,
Йæ рахиз цонг ныппырх и.

Жандармтæ Тыбылы-фыртыл фесты,
Лавренти та — тар хъæдмæ.
Гъæйтт-мардзæ, ирон сахъ лæппу,
Дзераны-фырт Лавренти!

«Музыкальная культура осетин» © 2011
 [bad word] ossmus
¯¯\/¯¯¯¯¯¯¯¯¯
☻/
/▌
/ \