Салауат Низаметдинов көйө
Зөһрә Ҡотлогидина шиғыры

Һин һорама "Хәлең нисек?"- тиеп,
Йәшәйем мин сабыр итә-итә.
Белгең килһә минең хәлгенәмде
Күҙҙәремә ҡара, шул да етә.

Һин һорама "Һағындыңмы?"- тиеп,
Йөрәк һаман осрашыуҙар көтә.
Белгең килһә минең һағышымды
Күҙҙәремә ҡара, шул да етә.

Һин һорама "Һөйәһеңме?"- тиеп,
Мөхәббәтем йөрәгемде өтә.
Белгең килһә минең һөйөүемде
Күҙҙәремә ҡара, шул да етә.