Қыз деген қырдың қызыл қызғалдағы,
Өмірдің сырлы сымбат сұлу сәні.
Бұраң бел, оймақ ауыз, қызыл ерін,
Жігіттің ойлайтыны, бір арманы.

Қыздардың теңдесі жоқ, бір асыл зат,
Ежелден бағалаған оны адамзат.
Қыздарға әсемдікті сыйға тартқан,
Ерекше мүсін беріп, бұл табиғат.

Қайырмасы (2 рет):
Қыздар-ай, қыздар-ай,
Қиылған қас, ақ маңдай.
Ашық түс, алма мойын,
Мөлдіреген қалқам-ай!

Қыз емес, қыздың аты - қызыл алма,
Сұлулық, әсемдікті жиған бойға.
Ай қабақ, алтын кірпік, қиылған қас,
Қыздарды ұқсатамын туған айға.

Жез таңдай, күміс көмей, сырғалым-ай,
Майысып, тал-шыбықтай тұрғаның-ай.
Жалт етіп қарағанда, бойым балқып,
Бөленіп махаббатқа тұрғаным-ай!

Қайырмасы (2 рет):
Қыздар-ай, қыздар-ай,
Қиылған қас, ақ маңдай.
Ашық түс, алма мойын,
Мөлдіреген қалқам-ай!