Кажан удуп, карак шийип турганыңны

Сагынгаш-даа, билбес мен чоп, күжүр авай.

Оттуг суугу кыдыында-ла турганыңны

Оттуп келген санымда-ла көөр чордум.

Чараштанып, онза кылдыр кеттингениң

Сагынгаш-даа, билбес мен чоп, күжүр авай.

Куурарып, оңа берген шыва тонуң

Кударанчыг ыры болуп, куттулуп чор.

"Өзе бергеш, көрүп турзун! Үеден бер!

Өрү депшип, улуг дарга апаргаштың,

Агайларның сынын каастаар чараш тонун

Авайым сээң эктиң орта каап бээр мен.

Сылдыстыгда хаяаландыр чырып чоруур 

Чыргалардан белек кылдыр сунар мен!" — деп,

Уйгум келбейн, дээвиирже кайгап алган

Улуг тынып, бодангылап чыткылаар мен...

Амдыы чаа-ла ону сактып ордум, авай,

Аравыска дириг бодуң чораан болза,

Агайларның кедер тонун эктиңге каап,

Алдын сырга эдилээрден — албас боор сен.

"Кенним уруг эргижирээн күскү тонун

Кедип каайн, төлдерим!" — деп дилээр боор сен.

Чараштанып, онза кылдыр кеттингениң

Сагынгаш-даа, билбес мен чоп, күжүр авай.

Куурарып, оңа берген шыва тонуң

Кударанчыг ыры болуп куттулуп чор