Союзом любве связуеми апостоли, владычествущему всеми себе Христу возложше, красны ноги очищаху, благовествующе всем мир. Лентием препоясавыйся и омывый ноги учеником, Христе Боже, омый души нашея помысл и опояши нас союзом духовным, еже творити заповеди Твоея благости. Уне тебе бяше, Иудо, Иудо, аще не бы зачался еси во утробе матерни. Уне тебе бяше, предателю, аще не бы родился еси, отчужденне Сына Божия. Тебе ради растерзася собрание ученик Христовых, и истинный виноград приемлет разбойник распинаемый. Тобою пресечеся градеж и храм нерукотворенный разоряют беззаконницы. Да аще миро грешницы почитал еси, яко многоценное, како Праведнаго кровь рукама беззаконных предати не ужаснулся еси, Сына Божия. Уне тебе бяше, предателю, аще не бы родился еси, отчужденне Сына Божия.