У нашым калгасе ўсё чыста, нябрудна,
Вядзе старшыня нас рукою магутнай.
Ён можа знянацку ўваліць трактарысту,
Калі трактарыст вып'е з сябрам па трыста.

У нашым калгасе ўсё супер, па лічбах,
А людзі чакаюць, калі ўжо, калі ўжо,
Калі старшыня наш паедзе адгэтуль,
А, лепш, паляціць на чужую плянэту.

Я сню, й ты прысні, што няма вось старшыні.
І ўсім радасна наўкола: і карове, і свінні.
Шмат гадоў мару я,
Што знікае старшыня,
І ўсе весела смяюцца: і карова, і свіння.

У нашым калгасе парадак і цішак, 
І шэпчуцца людзі, калі ўжо, калі ўжо, 
Калі закарэе хоць нейкая трасца,
І, урэшце, спакойна пажыць нам удасца.

Сядзяць у камбайнах сваі камбайнёры,
І справы йдуць, відавочна, угору.
І мроіцца ўсім, што нарэшце знікае
Рука, што ўсіх нас за горла трымае.

Я сню, й ты прысні, што няма вось старшыні.
І ўсім радасна наўкола: і карове, і свінні.
Шмат гадоў мару я,
Што знікае старшыня,
І ўсе весела смяюцца: і карова, і свіння.