Əziz dostum məndən küsüb incidi

    Əziz dostum məndən küsüb, incidi,
    Ayrılıb yad kimi çıxdı evimdən.
    Gəldiyi yolları ot basıb indi
    O gedib qalmışam həsrətində mən.

    Necə nəğmə qoşum, necə dillənim
    Dost gedib özümə gələ bilmirəm.
    Elə bil əllərim yox olub mənim,
    Gözümün yaşını silə bilmirəm.

    Çaldığım o sazı gətirin mənə,
    Görün ki, çalmaqda necə mahirəm.
    Əlim dəyən kimi bircə telinə
    Simlər haray çəkib qırılır o dəm.

    Necə nəğmə qoşum necə dillənim,
    Dost gedib özümə gələ bilmirəm.
    Elə bil əllərim yox olub mənim,
    Gözümün yaşını silə bilmirəm...