"ТУЛГАН АЙ"

Җандагы сагышка түзмичә,
Чумамын аяз тын кичләргә.
Ялгыз ай моңсулык билгесе.
Шуңамы тынгы юк. Нишләргә?

Монда да бездә күп тулган ай.
Йөзәдер ялгызы күкләрдә.
Тагын да өзелеп сагынам,
Сөйгәнем мин сине читләрдә.

Ай йөзә ялгыз ай арымыйча,
Болытлар томанын аралап.
Нәкъ синдәй ул йөзен ача да.
Елмая йөрәкне яралап.

Ялтырап көмеш су тәнкәдәй.
Ялгыз ай чайкала диңгездә.
Очынып талпынган җанымда,
Яшисең син генә, син генә.