Рафа бир фильджан къойдым,
Ичине мерджан къойдым.
Къайнананынъ адыны
Къуйрукълы сычан къойдым.

Не олды я, не олды я, къайнана,
Курегинъе туз къой, къайнана.
Огълум мени пек севе,
Юрегинъе буз къой къайнана.

Къайнананынъ неси вар,
Зурна киби сеси вар.
Къырмызы бибер киби
Тильден гъайры, неси вар?

Не олды я, не олды я, къайнана,
Курегинъе туз къой, къайнана.
Огълум мени пек севе,
Юрегинъе буз къой къайнана.

Къайнананы напмалы
Сёз вермей токътатмалы.
Чокъ багъырып башласа,
Сыпырып турып къачмалы.

Не олды я, не олды я, къайнана,
Курегинъе туз къой, къайнана.
Огълум мени пек севе,
Юрегинъе буз къой къайнана.

Чуллы баш, суфлю келин,
Эв-баркъынъ куфлю келин.
Огълум сени ташлайджакъ,
Улпакъ сач суфлю келин.

Не олды я, не олды я, яш келин,
Курегинъе туз къой, таш келин.
Не олды я, не олды я, яш келин,
Юрегинъе буз къой яш келин.

Келин севмединъ мени,
Козьяшынъ тутсын сени.
Козьяшынъ дерья олсун
Балыгъы ютсын сени.

Не олды я, не олды я, яш келин,
Курегинъе туз къой, таш келин.
Не олды я, не олды я, яш келин,
Юрегинъе буз къой яш келин.

Корьген, сени корьмесин,
Сёзюне къапылмасын.
Омрюнъ бою тул яша,
Ляйыгъынъ тапылмасын.

Не олды я, не олды я, яш келин,
Курегинъе туз къой, таш келин.
Не олды я, не олды я, яш келин,
Юрегинъе буз къой яш келин.

Бойле келин-къайнана
Бизим куньде олмасын.
Ана-бала яшанъыз,
Куль чырайлар солмасын.

Мабет олсун, мабет олсун келинлер,
Къайнаналар келинлери северлер.