Мутшо Альбертина Иванован,
Семже Вениамин Захаровын 

Чевергыш пызле суртна воктен,
Шӱмбел ялемым йыр волгалтен.
Ах, пызле, пызле, тамлен ом тем
Ал пызлыгичкым, — вашке каем. 2 гана

Ит шорт, авай,
Ит шорт, авай,
Мый пӧртылам, ӱшане, ах, ит шорт, авай!
Ит шорт, авай,
Ит шорт, авай,
Керек-куштат лият тый пеленем, авай.

Эрта кок теле, эрта кок май.
Таҥем, ит мондо, марлан ит кай!
Шинчавӱдетым шупшал коштем,
Тыгаяк ныжыл код ушыштем. 2 гана

Ит шорт, таҥем,
Ит шорт, таҥем,
Мый пӧртылам, тый вучо, йӱксӧ гай таҥем!
Ит шорт, таҥем,
Ит шорт, таҥем,
Ош солыкет гай лийже пӧртылмӧ корнем.

Пытартыш кече. Пытартыш кас.
Пытартыш семжым пӧлеклыш вальс.
Каласыш пызле: чеверын кай!
Ах, пызлыгичке чевер могай. 2 гана

Ит шорт, авай,
Ит шорт, авай,
Мый пӧртылам, ӱшане, тый ит шорт, авай!
Ит шорт, авай,
Ит шорт, авай,
Тек арала тораште сугынет, авай!