Wóosukhiye

Toháŋl tuwá thiléhaŋyaŋg í čháŋna hé tuwé kiŋ óhiŋni wók’upi. Na heháŋl tuwá lečhála wayé glí čháŋna hená thakhólaku kiŋ hená oyás’iŋ wičhákičho na hená ób wótiŋ na heháŋl íŋš wíŋyaŋ kiŋ hé tóna takúwičhaye čiŋ hená wičhákičho na ób íŋš-eyá oíyokiphiya úŋpi. Na heháŋl wíŋyaŋ waŋží wóahi čháŋna táku thaló etáŋ agná kičhúpi. Na heháŋl él húŋȟ wóyute čhóla wóahipi, háŋpa naíŋš wóyuha etáŋ. Na heháŋl toháŋl čhíŋpika él lowáŋ ahípi čháŋna hená wawíčhak’upi hená táku wóyuha héčha čha wičhák’upi šni tkhá hená wóyute ečé wičhák’upi. Thaló naíŋš tháȟča há etáŋhaŋ. Na óhiŋhiŋhaní-ȟči íčhikhiyela thípi eháŋtaŋš wókičhičaípi s’a. Na tuwá thawáčhiŋ wašté čha ikhíyela thípi čháŋna óhiŋniyaŋ taŋyáŋ thípi s’a. Na toháŋl tuwá thawáčhiŋ šíča čháŋna ikhíyela thípi čhíŋpi šni. Heháŋl wičhá kiŋ íŋš óhiŋniyaŋ čhaŋnúŋpa yuhá úŋ na tuwá hí čháŋna wáŋčag opáǧi na ób čhaŋnúŋpa-hiŋ na heháŋl íŋš thakhólaku kiŋ wičhákičho s’a. Heúŋ íŋš wičháša kiŋ thí él aú s’a na él óhiŋniyaŋ wičháša ahí s’a. Hená thawáčhiŋ wašté ewíčhakiyapi kiŋ eépi. 
Tuwá opáǧi kiŋ hé tókhel wasúye čiŋ hé slolyápi šni eháŋtaŋš iyúŋǧapi čháŋna ečhél owíčhakiyake. Čhaŋnúŋpa kiŋ hé čhatkáyataŋhaŋ kuyápi kta héčiŋ naíŋš išláyataŋhaŋ tukté uŋmá ečhúŋpi kte čiŋ ečhél owíčhakiyaka čháŋna ečhél ečhúŋpi. Naíŋš ithókab iyáye šni wasúyapi eháŋtaŋš naíŋš čhaŋnúŋpe čiŋ ičháŋl tuwéni čhuwí él iyáwičhaphiŋ kte šni eháŋtaŋš nakúŋ ečhél ečhúŋpi. Na heháŋl wičháša waŋží čhaŋnúŋpe č’éyaš iyé íyatayela iyátaŋ šni eháŋtaŋš úŋpe šni wasúya. 
Heháŋl nakúŋ thí kiŋ hél tuwéni míla uŋ phetúste kahúŋ šni wasúya haŋtáŋš ečhúŋpi šni. Tkhá tuwá iníhaŋšni phetúste kahúŋ eháŋtaŋš waíč’ihuŋ kéyapi. Nakúŋ míla tuwéni čhéǧa waŋkáb iyéye šni was