Равон шуданд чор ҷавон,
Ҳар чор гирифтанд камон, 
Онҳо шуданд пурармон.

Ё мавло, ё мавло, ё мавло!

Падар бигуфт ба писар:
«Имрӯз накунед сафар. 
Сафаратон пурхатар.»

Ё мавло, ё мавло, ё мавло.

Модар гуфто: «Бачаҳо!
Асло нестам ман ризо.
Хайр! Паноҳат ба худо!»

Ё мавло, ё мавло, ё мавло.

Қадам заданд якбора,
Тарма расид аз дара,
Мулло бихонд ҷаноза.

Ё мавло, ё мавло, ё мавло.

Модар, ки гирья мекард,
Сангҳоро бар сар мекард, 
Нолаи бача мекард.

Ё мавло, ё мавло, ё мавло.