Миром Господу помолимся. Господи, помилуй.
О свышнем мире и спасении душ наших, Господу помолимся. Господи, помилуй.
О мире всего мира, благостоянии Святых Божиих Церквей и соединении всех, Господу помолимся. Господи, помилуй.
О святем храме сем и с верою, благоговением и страхом Божиим входящих в онь, Господу помолимся. Господи, помилуй.
О Великом Господине и Отце нашем Святейшем Патриархе (имя рек), и о Экзархе его Господине нашем Высокопреосвящениейшем Митрополите (имя рек), честнем пресвитерстве, во Христе диаконстве, о всем причте и людех, Господу помолимся. Господи, помилуй.
О Богохранимей стране нашей, властех и воинстве ея, Господу помолимся. Господи, помилуй.
О святей обители сей, всяком граде, стране и верою живущих в них, Господу помолимся. Господи, помилуй.
О благорастворении воздухов, о изобилии плодов земных и временех мирных, Господу помолимся. Господи, помилуй.
О плавающих, путешествующих, недугующих, страждущих, плененных и о спасении их, Господу помолимся. Господи, помилуй.
О избавитися нам от всякия скорби, гнева и нужды, Господу помолимся. Господи, помилуй.
Заступи, спаси, помилуй и сохрани нас, Боже, Твоею благодатию. Господи, помилуй.
Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим. Тебе, Господи.
Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.
Аллилуия, аллилуия, аллилуия. Глас 2.
От нощи утренюет дух мой к Тебе, Боже, зане свет повеления Твоя на земли. Аллилуия, аллилуия, аллилуия.
Правде научитеся живущии на земли. Аллилуия, аллилуия, аллилуия.
Зависть приимет люди ненаказанныя. Аллилуия, аллилуия, аллилуия.
Приложи им зла, Господи, приложи зла славным земли.  Аллилуия, аллилуия, аллилуия.
Вышния Силы подражающе на земли, победную песнь приносим Ти, Блаже: Свят, Свят, Свят еси, Боже наш, Предстательствы Безплотных Твоих помилуй нас.
Слава Отцу и Сыну и Святому Духу
Несозданное Естество, всех Зиждителю, устне наша отверзи, яко да возвестим хвалу Твою, вопиюще: Свят, Свят, Свят еси, Боже наш, молитвами всех святых Твоих помилуй нас.
И  ныне и присно и во веки веков. Аминь.
От одра и сна воздвигл мя еси, Господи, ум мой просвети и сердце, и устне мои отверзи, во еже пети Тя, святая Троице: Свят, Свят, Свят еси, Боже наш, Богородицею помилуй нас.