Пый кIочIэшхор хэкум зытеом
Адыгэр зыфэдэр рагъэшIагъ.
ИлIыблэныгъэр хъишъэм хэхьагъ.
А лIыхъужъыр о къэплъфыгъ,
Адыгэ бзылъфыгъ.
Адыгэм игъашIэ лъыогъэкIуатэ, 
Уидэхагъэр - идэхагъ.
ЩыIэ къэгъагъэхэр пфэсэгъэшъуашэ,
Зэрэдунаеу пфэсэгъэIылъы,
Адыгэ бзылъфыгъ.
Лъэпкъы пстэумэ зэнэкъокъухэу
Ябзылъфыгъэхэр уашъом дахьые.
СэркIэ уилъэхъомбэжъые ахэр ыуасэп, 
Анахьы кIасэу,
Адыгэ бзылъфыгъ.
ЩыIэныгъэ гъогум урыкIозэ
УмышIахэу цуным ухещэ.
Сыгъощагъоу шIункIым сыхэтмэ
Къэогъэнэфы, гур дэощае,
Адыгэ бзылъфыгъ.
Псауныгъэ закIэп, гъунэри къэсы.
Чэзыур къэсмэ сырэхьат
Сыт фэдиз цIыф къысфекIолIагъэмэ
Оры шъыпкъэу сызыгъэежьыщтыр,
Адыгэ бзылъфыгъ.