Мыйла эськö

Кывбур Геннадий Юшков 
Шылад Василий Гущин

1. Мыйла эськö гöтырыд
Абу куим-нёль?
Сэки эськö некодöс
Öткöн эн и коль.
Эн и дöзмы некодысь,
Сöмын ваш да ваш,
Сы вöсна мый быдöнысь
Бырлiс эськö гаж.

2. Мыйла эськö верöсыд
Абу нёль-ö-вит?
Сэки эськö некодöс
Некор он и вид.
Мый тэн колö вöчасны,
Сöмын налы шу.
Сё майбырöй, нинöмысь
Шогыд оз и су.

3. Петалас мед ставныдлы
Кыв йыланыд мыльк.
Ми öд сöмын шмонитам,
Огö шуöй збыль.
Ассьыд понтö вöравны
Некодлы он сет.
Ок öд öти гöтырыд
Витлöн вöлi мед?!
О-го-го-го-го…

4. Аттö найö кутшöмöсь,
Гачаöсь, дай сiдз!
Миянлы на сетлöма
Енмыс тадзи мич.
Верöс саяд петам да,
Юрным оз на усь.
Кöнкö гусьöн тiян моз
Некод на оз узь.

5. Вайö дугдам вензьыны.
Дугдамöй и эм!
Сы вылö и муслуныс,
Мед оз куслы нэм.
Гöтрасям да гозъяыд,
Быттьö топыд йöр:
Некод оз лысьт сюйсьыны,
Некод оз и тöр!