Елеп үтте ғүмер юлым
Һиҙмәй ҙә ҡалдым үҙем,
Әйтерһең дә хәтфә болон,
Ә мин ел булып иҫтем...

Ҡушымта:
Үкенмәйсә йәшәүҙәргә
Был донъяла ни етә:
Үкенесле булмай ғүмер
Изгелектәрҙә үтһә.

Ғүмер үтә, йүгәнһеҙ уй
Йәшлеккә кире елә:
Күңелемде һаҡлай бит ул – 
Ҡартлыҡты кисектерә.
Ҡушымта.

Аҡ сәстәрҙе, маңлай һырын
Ғүмер үҙе һалалыр...
Изге эштәрҙе фәрештәләр
Ғәмәлдәргә яҙалыр.
Ҡушымта.