1. В начале бе Слово, и Слово бе к Богу, и Бог бе Слово.
2. Сей бе искони к Богу:
3. Вся Тем быша, и без Него ничтоже бысть, еже бысть.
4. В Том живот бе, и живот бе свет человеком:
5. И свет во тьме светится, и тьма его не объят.
6. Бысть человек послан от Бога, имя ему Иоанн:
7. Сей прииде во свидетельство, да свидетельствует о Свете,  да вси веру имут ему.
8. Не бе той свет, но да свидетельствует о Свете:
9. Бе Свет истинный, иже просвещает всякаго человека грядущаго в мир:
10. В мире бе, и мир Тем бысть, и мир Его не позна:
11. Во своя прииде, и свои Его не прияша.
12. Елицы же прияша Его, даде им область чадам Божим быти, верующим во имя Его,
13. Иже не от крове, ни от  похоти плотския, ни от похоти мужеския, но от Бога родишася.
14. И Слово плоть бысть и вселися в ны, и видехом славу Его, славу Его Единородного от Отца, исполнь благодати и истины.
15. Иоанн свидетельствует о Нем и воззва глаголя: Сей бе, егоже рех, иже по мне грядый, предо мною бысть, яко первее мене бе.
16. И от исполнения Его мы вси прияхом и благодать воз благодать.
17. Яко закон Моисеем дан бысть, благодать же и истина Иисус Христом бысть.
18. Бога никтоже виде нигдеже: единородный Сын, сый в лоне Отче, той исповеда.

19. И сие есть свидетельство Иоанново, егда послаша жидове от Иерусалима иереи и левиты, да вопросят его: ты кто еси?
20. И исповеда и неотвержеся: и исповеда, яко несмь аз Христос.
21. И вопросиша его: что убо?  Илия ли еси ты? И глагола: несмь; Пророк ли еси? И отвеща: ни.
22. Реша же ему: кто еси? Да ответ дамы пославшим ны: что глаголеши о тебе самом?
23. Рече: Аз глас вопиющаго в пустыне: исправите путь Господень, яко же рече Исаия пророк.
24. И посланни беху от фарисей;
25. И вопросиша его и реша ему: что убо крещаеши, аще ты неси Христос, ни Илия, ни пророк?
26. Отвеща им Иоанн, глаголя: аз крещаю водою: посреде же вас стоит, его же вы не весте.
27. Той есть грядый по мне, иже предо мною бысть, ему же несмь аз достоин, да отрешу ремень сапогу Его.
28. Сия в Вифаваре быша  об он пол Иордана, идеже бе Иоанн крестя.

29. Во утрии же виде Иоанн Иисуса, грядуща к себе и глагола: се, агнец божий, вземли грехи мира: 
30. Сей есть, о нем же аз рех: по мне грядет муж, иже предо мною бысть, яко первее мене бе:
31. И аз не ведех его, но да явится Израилеви, сего ради придох аз в воде крестя.
32. И свидетельствова Иоанн, глаголя, яко видех дух, сходяща ко голубь с небесе, и пребысть на Нем:
33. И аз не ведех Его: но пославый мя крестити водою, той мне рече: над негоже узреши дух, сходящ и пребывающ на Нем, той есть крестяй духом святым.
34. И аз видех и свидетельствовах, яко сей есть сын божий.