АНАҒА САҒЫНЫШ

Әні: Гауһар Әлімбекова.
Өлеңі: Исраил Сапарбай.

1. Жетісай – біз өскен жер, талды мекен,
Ауылдың айналасы сәнді ме екен?
Аялап жер-бесікке бөлеп едік,
Ұйқысы жан анамның қанды ма екен?

Қайырмасы:

Қарайлап қара көзің талды ма екен?
Елжіреп ет-жүрегің жанды ма екен?
Апыр-ай, ай мен күннің аманында
Айрылып қалай сенен қалдым екен...

2. Жалғанда кім аясын шыбын жанды,
Жібектей жүрегімде үнің қалды.
Жармасқан етегіңе ұл-қызың мен
Өсірген өзің баптап гүлің қалды.

3. Еске алып елжіреген кезіңді мен,
Көрсем деп елесіңді көзімді ілем.
Жанымды қоятұғын жер таппаймын,
Анашым, аңсағанда өзіңді мен.