Музыка Курман-Али Узденова, стихи Биляла Аппаева.

Кюн тийгенди мийик кёкде, нюрюн чача.
Уллу юйле сюелелле, къалалача.
Къонакъ келсе, эшиклерин кенгнге ача,
Сен джашайса туугъан элим - Ючкекеним.

Эжиую:
Чагъадыла этеклеринг - кенг талала,
Гум бойнунда малла джая, чалкъы чала,
Бюгюнден тамблагъа айбат бола,
Сен джашайса туугъан элим - Ючкекеним.

Кёрмегенме сендеча ариу къызланы мен
Ийнан, бирин унутады бирин кёрген, -
Аладыла кёб джашлагъа ауруу берген,
Кюёу айырыб сайлагъан Ючкекеним.

Эжиую.

Джашларынг а учхан къушдан тюк алалла,
Алыб ташны сыкъсала, сют чыгъаралла,
Урунууда кёблеге юлгю болалла,
Джигитлени бешигисе, Ючкекеним.

Эжиую.

Эскиликни аякълары тутмай, тая,
Джангылыкъгъа къанатларын кенге джая,
Сенге къараб къууанады Къалеж къая,
Туугъан джерим, ариу элим - Ючкекеним.

Эжиую.

Джетишимле кёрюнеди къарамынгда,
Уллу шохлукъ къуршча бегиб халкъларынгда,
Шахар тюрсюн кёрюнеди хар орамда,
Туугъан элим, джаным-тиним - Ючкекеним.

Эжиую:
Чагъадыла этеклеринг - кенг талала,
Гум бойнунда малла джая, чалкъы чала,
Бюгюнюнгден тамблагъа айбат бола,
Сен джашайса туугъан элим - Ючкекеним.