Тамара Юлдашева

КЛЕОПАТРА

Оҙон муйын, наҙлы ҡараш
Мысыр батшабикәһе,
Һулыштарҙың иң ҡайнары,
Ҡараштарҙың — текәһе!

Һырғаланған алҡалары,
Борғоланған йыланы.
Клеопатра, һинең янда
Битарафтар буламы?

Ҡыйыу, бәҫле уй һалынған
Һинең бейек ҡалпаҡҡа.
Цезарь үҙе эләккән бит
Һинең ҡараш-ҡармаҡҡа.

Һөйөүеңдә һин илгәҙәк,
Һөйөүеңдә һин ихлас,
Ләкин күпкә иркенерәк
Уй-фекереңдә ҡолас.

Теләктәрең бейеклеге,
Талаптарың хаҡлығы!
Ҡараштарың бөйөклөгө —
Терәктәрең юҡлығы...

Илең өсөн, улың өсөн,
Ғәзиз Мысыр хаҡына
Һин инәһең йөҙ бәхәскә,
Йөҙ ҡылыстың аҫтына.

Ниндәй моң ул,
Тирбәндереп,
Аса дәүер ишеген?..
Клеопатра! Бәүелтәһең
Тарихтарҙың бишеген.