Кезәнә нег хан күүкнднь әрк ирл уга, сәнь һолад, мунь әәһәд, әрк зөл уга бәәхлә, тегәд күүкнь көгшрәд наста болад ирхлә, эврәннь алвтарн далн хойр худл келсн күүнд күүкән өгнәв гиснд, нег угатя эцк көвүн хойр худл келҗ. Эцкнь далн негн худл келәд, далн хойрдгчинь олҗ келҗ чадл уга, күүкнәс хоосн дошч; эцкән келәд дуусхла, көвүнь келҗ. Экләд келн, дегд ховдглҗ келәд, далн хойрас давулад, худл келәд оркҗ. Түүгинь хан соңсчаһад: "Би чамаг далн хойр худл кел эс гилүв, чи далн һурвн худл келчквч, чи дегд худлч сәнҗч, күүкән чамд өгшгов", – гиһәд көөһәд һарһчкҗ.
Көвүнә келсн худлнь иим:

Эцкәсн түрүлҗ һарад,
Элнцг эцкиннь аду хәрүлләв.
Һарад уга шар ат унад,
Урһад уга уласар
Уурһ кеһәд,
Төмәд уга деесәр
Хүүв кеһәд,
Һаң ик халунд,
Һазр ик дүүҗмд
Адуһан хәәһәд һарлав.

Тегәд эн
Һаң ик халунд,
Һазр ик дүүҗмд
Орад уга бора орулад,
Шуурад уга шуурһ шуурулад,
Йовҗ йовад, ик гидгәр
Өлсн ундасув.

Тегәд өөр шидр
Худг бәәвзго гиһәд,
Энд-тендән хәләхлә,
Өл Маңхин уулын
Ора деер
Ор һанц цандг
Гилс гиҗ үзгдв.
Эн цандгиг үзн бийәрн
Эвтә шар атарн
Гүүлгүләд күрәд ирхлә,
Эн цандг
Көвәнь өтәд,
Дундкнь
Тө болн дөрү көрәд оч.
Иигәд көрч одсн цандгас
Ус уудг арһ
Уга болв.
Тегәд йир яһс гиҗәһәд,
Толһаһан таслҗ авад,
Толһаһарн мөс цоолчкад,
Ус ууһад, ундан хаңһавув.
Усан ууҗ авчкад,
Буурин толһан чинән һанздан
Ботхна чимгнә дүңгә
Сурул зүүһәд,
Боодг-боодгарнь тәмк чикәд,
Сурулан амндан авхар седхлә,
Амм уга, олдҗахш.
Би толһаһан
Ус уусн һазртан
Мартад оркҗ билтәлв гиһәд,
Хәрү цандгтан күрәд ирхлә,
Толһам:
"Мана күн күрәд ирвш!" – гиҗ
Өмнәсм марзг-марзг инәв.
Өөрдҗ ирәд хәләхлә,
Дорд бийнь көрәд оч,
Деед бийнь өтәд,
Ү-түмн батхнд идүлҗәҗ.

Толһаһан өргҗ авад,
Өтн-батхнынь
Саҗад унһачкад,
Зүүҗ авад,
Һанзан амндан авад,
Цасар цәкүр кеһәд,
Усар ул кеһәд,
Цәрд цәкәд,
Бурд уңһдаһад
Утаһинь үүлнлә хутхлдулад,
Үмсинь һазрла хутхлдулад,
Чирд нульмад,
Җирлһнд күргәд,
Алххин арвн тавн дуунад
Һарад йовув.
Тиигәд йовҗ йовад,
Нег хотхрур орад ирүв.
Ирхлә,
Батхнинкн күүрләд-күүрләд,
Тасрад негдәд, тасрад негдәд,
Өнчән авлдҗаҗ.
Тегәд теднүр өөрдәд одув.
Өөрдәд күрәд ирхлә,
- Хол һазрас йовсн эн күүһ&a