Музыка и стихи Исмаила Семенова (Джырчы Сымайыла) (1891-1981).

Эжиу:
Орайда, орайда, райда,
Орайда, райда, орайда.
Орайда, орайда, райда,
Орайда, райда, орайда.

Сен кёкге джете, мийиксе
Ууакъ (Кавказ) тауланы ичинде.
Мияла кибик, джылтырай,
Къанга бузларынг юсюнгде.

Сен джулдузлагъа джанаша,
Къалгъанла сенден алаша.
Кийиминг ариу джараша,
Къалай сейирсе, тамаша!

Чынг алгъа санга танг ата,
Чынг артда сенден кюн бата.
Сен кийиз бёркню агъарта,
Этегинг джашил къатапа.

Сенден сора къайсы тауду
Ариулукъ бла айтылгъан,
Башына байракъ тагъылгъан,
Белине гюрен тартылгъан?

Сенден сора къайсы тауду
Ариулукъ бла бай болгъан,
Башы къыш болуб, бели джаз болуб,
Этеклеринде джай болгъан?

Юсюнгде барды акъ тонунг,
Сен джай да, къыш да киесе.
Кюн бузулургьа тебресе,
Боран этерге сюесе.

Кюн ариу, чууакъ тургъанлай,
Тохтамайды боранынг,
Джай да, къыш да эримейди
Юсюнгдеги бузларынг.

Къыш айланы бораныса,
Джай айланы салкъыны.
Джумушакълыкъ этмесенг,
Инджитириксе халкъынгы.

Кесин бегитмей чыкъгъаннга
Башха болмай бир джауса,
Сау дунияны башында
Эм белгили бир тауса.

Тёгерегингде тогъай отлайла
Алтын мюйюзлю кийикле.
Сени башынга чыгъалла
Бёгекле бла, джигитле.

Москвадан курсауайла
Келиб сейирге къарайла.
Къайнаб чыкъгъан гара сууларынг
Ауругъанлагъа джарайла...

Эжиу:
Орайда, орайда, райда,
Орайда, райда, орайда.
Орайда, орайда, райда,
Орайда, райда, орайда.