Я обманывать себя не стану (на осетинском)
Перевод - Инал Плиев

Æз мæхи нæ сайдзынæн мæхæдæг,
Фенкъард зæрдæ, нал хъуысы йæ зарæг,
Адæм мæн цæмæн хонынц гæдылæг,
Адæм мæн цæмæн хонынц хылкъахæг?

Æз фыдуаг нæ дæн, нæдæр - абырæг,
Ахæстæтты мæгуырты нæ марын, -
Дæн хуымæтæг, уынгты лæппу, хъæлдзæг,
Кæуыл бамбæлын, уыдонмæ фæхудын.

Æз мæскуыйаг хъеллауаг къæбæда,
Алкæмæн – чысыл лæвар мæ роны,
Ацы уынджы алкæцы къæбыла
Мæн мæ рог хъылдым цыдтытæй зоны.

Исты ‘фхæрд бæх мæн куы фены уынджы, -
Сцин кæны, уысммæ йæ маст æтайы,
Сырдтæн хорз хæлар дæн æз, æууæнкджын,
Ме ‘мдзæвгæтæй сырдты зæрдæ райы.

Æз цилиндры устытæм нæ цæуын,
Сонт хъуыдытæй зæрдæйы бон нал у, -
‘Ххормаг бæхæн адджын холлаг дарын
Цилиндрæй æнцон æмæ æхцон у.

 Адæмы ‘хсæн æз хæлар нæ зонын,
Ис æндæр паддзахады уацар мæ зæрдæ,
Алкæцы куыдзы фыртæн йæ риуыл
Бакæнин мæ галстуктæн сæ хуыздæр.

Ныр мæ хъыг фæлыгъд, ирвæзт дæн мастæй,
Тар зæрдæмæ хуры тын ныккасти:
Уымæн хонынц адæм мæн гæдылæг,
Уымæн хонынц адæм мæн хылкъахæг.