Зашумела шум-дуброўка,
Ой заплакала млода ўдоўка.
Ой заплакала млода ўдоўка.

Заплакала затужыла,
А што ж я ў Бога заслужыла,
А што ж я ў Бога заслужыла.

Усе дружкі з вайны едуць,
А майго дружка коня вядуць,
А майго дружка коня вядуць.

Ой мой конік вараненькі,
А дзе ж мой дружок маладзенькі.
А дзе мой дружок маладзенькі.

У чысту полі пры даліне,
Ой ляжыць дружок як быліна,
Ой ляжыць дружок як быліна.

У правой ручцэ шаблю дзёржыць
А на левую нахіляе
А на левую нахіляе.

На левую нахіляе,
І з таварышам размаўляе,
І з таварышам размаўляе.

Ты таварыш брацяц раднай,
А накажы жане маёй,
Ой накажы жане маёй,

Няхай яна міні не жжэ,
І нехай сабе замуж ідзе,
І нехай сабе замуж ідзе.

Калі ей там лепей будзе,
То яна мене прызабудзе,
То яна ж мене прызабудзе.

А калі ёй будзе гора будзе,
То яна па мне плакаць будзе,
То яна па мне плакаць будзе.