Қуаныш Қолқаев

Асыл жарым

Асыл жарым – ар намысым, ақ гүлім,
Жүзім жарқын, көңілім де шат бүгін.
Маған қазір бақыт дейтін тәтті ұғым –
Сенің адал сезімің мен пәктігің.

Тұрғыны көп мынау ғажап ғаламда,
Мен сендікпін, сен мендіксің, ал, онда,
Басқалардың сүймек түгіл бетіңнен,
Хақысы жоқ көзін қадап қарауға.

Сөзімді осы сіңіріп ап сол күйде,
Мені ғана жүрегіңде әлдиле.
Басқалармен құшақтатып беліңді,
Вальс түгіл билетпеймін жай биге.

Керек болса ұласатын кекпенен,
Қызғанышым – қызыл алау от дер ем.
Саған, тіпті, достарым да ең жақын,
Қолын беріп сәлемдессе жек көрем.

Әйелді Алла аманат қып бергесін,
Аманатты сақтап өту ерге сын.
Мен жоқ кезде келер болса мені іздеп,
Бөтен еркек есігімнен енбесін.

Тар да болса өз үйім ол – ақ сарай,
Ақ сарайда күн кешейін патшадай.
Жаным барда жан-тәніммен қорғаштап,
Мен өзіңді жақсы көрем нақ солай.