Ат эсерәм йылыуҙан, 
Күҙ алмайым һылыуҙан, 
Һыҙғырып та ебәрәм, 
Әллә йөрәк ярһыуҙан. 

Их, һыуға барыуҙарың, 
Һыу һирпеп алыуҙарың, 
Тик һүндермәй һыуҙарың 
Йөрәгем ярһыуҙарын. 

Һыҙылып таңдар атҡанда, 
Һыуҙар алып ҡайтҡанда, 
Түгелмәне һыуҙарың — 
Түгелде күҙ нурҙарың, 
Түгелде күңелемә 
Һыу ташымай, ут ташыйһың – 
Әллә еңелме миңә? 

Ал таңдың атыуҙары, 
Аҡ томан ятыуҙары, 
Ат эсереп, һыу күтәреп, 
Аһ, бергә ҡайтыуҙары!..

Рәми Ғарипов.