1.
Ынде мом ыштем, ом пале, -
Йогынвӱд мӧҥгеш ок кай,
Ош вӱргенчыкет йымалне
Тый коят ош йӱксӧ гай.
Шергашан кидет гыч налын,
Каче вальсышке луктеш,
Чон пиалым, еш пиалым
Тыланен, шумем шортеш.

Припев:
Юмын ӱдыр, Юмын ӱдыр,
Ош кава гыч воленат,
Пиалемлан, орлыкемлан
Мыланем тый конченат.
Юмын ӱдыр, Юмын ӱдыр,
Ах, кузе тый шыргыжат!
Но молан гын, но молан гын
Весылан тый шочынат?

2.
Ах, кузе чӱчкен да лоҥын
Шӱвыр-тӱмыран сӱан.
Мыйын огыл, мыйын огыл! -
Шинчавӱд пурам йӱам.
Тиде сий моткочак кочо,
Вет оръеҥже - чон ойгем.
«Кочо, кочо, ой, пеш кочо!» -
Шинчавӱд вошт кычкырем.

Припев.

3.
Ынде мом ыштем, ом пале, -
Шонкален, ушем кая:
Кидпӱан гыч тыйым налын,
Весе-весе наҥгая.
Шып ончальыч ваче гочын,
Пуйто шижын шонымем.
Пӱрен отыл, пӱрен отыл,
Пӱрен отыл мыланем.

Припев.