1 Безгә яңа малай килде,
Чәчләре кара бөдрә,
Шул бөдрә чәчләре белән
Көн дә төшемә керә.

Җенем сөйми бөдрә чәчне,
Ә кызлар аңламыйлар,
Шушы бөдрә чәчләреннән
Күзләрен алалмыйлар.

Припев: Ничек елмая белә бит
Шундый матур иттереп.
Нигә эри шуңа йөрәк,
Ачуымны китереп!..

2 Шуннан бирле үземнең дә
Күңелем әллә нишләде:
Ачуыма тия шуның
Дулкын- дулкын чәчләре.

Моның ише бөдрә чәчләр
Кызларда да бик сирәк.
Әйтегезче, ир-егеткә
Мондый чәчләр ник кирәк?!

3 Өстәвенә,күргән саен
Каршыма килгән була,
Әнҗе тешләрен балкытып,
Елмаеп килгән була.

Елмайса елмайсын, әйдә.
Карамыйм да үзенә.
Тик аңламыйм,нигә болай
Ялкын каба йөземә?