Поучение иже во Святых отца нашего Иоанна Златоустаго, архиепископа Константина-града, слово на Святую Пасху учительно. И о еже опоздевших к подвигу постному.

Иже аще кто, боголюбив, и благоверен и благочестив, да примет сего добраго бисера, и насладится нынешняго честнейшаго торжества.

Иже аще кто есть благоразумен от раб благонравных, да внидет радуяся в радость Господа своего. Аще кто делал есть постяся, да воспримет ныне сребреник. Аще кто от первого часа делал есть, да примет днесь праведный долг. Аще кто по третием часе прииде, благодаря да празднует. Аще кто по шестом часе достиже, ни что же да усомнится, ибо ни чим же отщетевается. Аще ли кто и девятаго часа улишися, да приступит без сомнения, ни что же бояся. Аще ли кто и воедино на десятый час прииде, да не устрашится срамляяся замедлением.
Человеколюбив бо есть Владыка, приемлет последняго, якоже и перваго, утешает, иже в единодесятый час пришедшаго, якоже делавшаго от перваго часа. И последняго милует, и перваго утешает. И оному дает и сему дарствует. И делание почитает и предложение хвалит, и спех умедлившаго любит.
Тем же убо внидите вси, в радость Господа своего, и первии и втории и последнии, мзду примите. Богатии и убозии и нищии, друг со другом ликуйте. Воздержницы и ленивии день почтите. Постившиися и непостившиися, возвеселитеся днесь.
Трапеза церковная готова исполнь, насладитеся вси. Телец упитанный предлежит. Ни кто же изыди алчен, вси насладитеся пира церковнаго, вси воспримите богатство благости. Да ни кто же рыдай нищеты, явибося общее Царство.
Ни кто же да ослабеет, ни кто же плачется согрешении, отпущение бо купно и оставление от гроба восия. Ни кто же да убоится смерти, свободи бо нас Спасова смерть. Угаси бо ея иже от нея Держимыи. Умучи ада Сшедыи во ад. Горе бысть ему вкусившу плоть Его.
И се предварив Исаиа возопи, ад рече огорчися, срет Тя доле. Огорчися, ибо наруган бысть. Прият Тело и Богу приразися. Прият землю и срете небо. Прият еже видяше и впаде воеже не ведяше.
Где ти смерте жало? Где ти аде победа? Воста Христос, и низложися ад. Воста Христос, и падоша бесове. Воскресе Христос , и радуются Ангели. Воскресе Христос и жизнь живет вовсем мире. Воскресе Христос, и мертвец ни един во гробе. Христос бо воста от мертвых, начаток умершим бысть. Тому слава и держава, во веки веком, аминь.