Гузельсин, гузель, дагъларынъ юдже,
Юректе барсынъ - тиз чёкер эджель.
Сендедир, билем, омрюмнинъ сыры,
Ялынъыз сенсинъ юрегим йыры.

Дюньяда барсынъ, эй, ана - Къырым!
Сен меним битмез, тюкенмез йырым.
Ватаным - Къырым, миллетим - Къырым.
Олюм де - Къырым, тирим де - Къырым.

Таламакъ ичюн яптылар ырым,
Эздилер мени, ольсин деп йырым.
Такътылар лагъап - олдым мен татар,
Истеген мени сагъ-солгъа сатар.

Иджреттен къайтам эп тамчы, тамчы,
Забитлер ура эп къамчы, къамчы,
Тишлерим сыкъып, ёл алдым Оргъа, 
Чал атым меним ельаякъ ёргъа.